Tuesday, May 8, 2007

دليلك يا انستى عشان تعلمى بنت ستايل على خطيبك " مشيها خطيبك "


البنات دول عليهم شوية حركات

كتب بواسطه / واحد خايف عليكى من الفضيحه مش اكتر


آنستي العزيزة.. لو ربنا فك عقدتك.. واتخطبتي.. فإليك نصائحي حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس.. قصدي قفص الزوجية السعيد..بالطبع أجمل ما في الخطوبة العزومات الرومانسية.. على أحلى محلات أكل فـ البلد.. وابقى قابلينى لو شفتيها بعد الجواز.. المهم نصائحي لك عند أي عزومة مع خطيبك هما شوية حركات عشان تظهرة فى نظره بنت ستايل !!!
1-
- لازم تعرفي فى الأول إن الشوكة والسكينة بيتمسكوا من إيديهم من الطرف يعني مش م الوسط ولا م البوز زي الخنجر ولا من فوق طبعًااا
2-
العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري.. أوعي.. العيش يامام بيتقطع بالسكينة فـ الطبق.. وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على أعصابك جدااا وبعدين لما تروَّحي.. إبقي حِفِّي زي مانتِ عايزة فى البيت !!....
3
- الشوربة.. أبوس كعب رجلك.. بند الشوربة ده مهم جدًاااا.. الشوربة تتشرب من غيرصوت خالص.. ومن غير ماتقعدي تنفخي فيها.. زي القهوجي اللي بينفخ فـ لحجر للزبون.. وطبعًا عايزك تنسى تمامًا.. السلطانية اللي بتقيميها على بقك فـ لبيت.. وتدلدقي على روحك.. تشربى بالمعلقة وبدون صوت.. سخنة ولعة برضه بدون صوت.. وتسيبي تلت الطبق ع الأقل.. مش تميليه.. عشان تلهطيها لآخر نقطة.....
4
- أما الرز بقى فأوعى تنسى أنه بيتاكل بالشوكة.. أوعي إيدك تتمد ع المعلقة.. وتغرفي من طبق الرز وتعبي.. إوعي.. الرز بالشوكة.. وكأنك بتبوسيه مش بتاكليه
..5-
المكرونة.. الاسباكتي.. برضه بالشوكة.. تتلف على طرف الشوكة.. لحد ما تخلص
وبعدين تحطيها فـ بؤك من سكات.. مش تشفطي المكرونة عود عود
..6-
والسمك ده مشكلة لوحده شوفي.... لازم تفصلي اللحم عن الشوك.. بتقولى أزاى ؟! تقطعي اللحم من النص.. بالطول وبعدين تفردي اللحم ع الجانبين ولما تخلصي ناحية.. متقلبيش السمكة.. بلاش فلح الله يسترك .. شيلي السلسلة بالشوكة والسكينة وحطيها ف جنب الطبق وكملي أكل النص التاني.. وبدل الفيلم الهندي ده.. نصيحة.. ماتكليش السمك خالص.. قولي مابحبش السمك وخلصي نفسك..
7
- الجمبري ..إذا كنتي عارفاه-.. أول ماطبق الجمبري ينزل.. بصيله بقرف واحتقار شديدين.. آل يعني زهقانة من كتر أكل الجمبري الجامبو ف بيت ببااه .. وأتنهدي جامد وقولي.. برضه..؟؟؟ وتروحي قاطعة راس الجمبريياية.. بالشوكة.. أنا ف عرضك إنسي المصمصة دلوقت..
8-
البطاطس سواء مسلوقة أو محمرة.. أوعي تهرسيها وتدبيها ع الرز وتحدفى لالقذائف ديه على نفق شبرا ( اقصد فمك المصون ) .لا..لآ...لآ...بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي..
9
- الفاكهة.. لو الفاكهة فيها بذر.. طلعيه من بؤك بالراحة وحطيه ف إيدك وهي مقفولة.. وبعدين فى طفاية السجاير اللي ع الترابيزه.. أوعي ياحبيبتي من نظام التفتفة للبذر.. إنسي....
10-
ولما تخلصي أكل تحطي إيدك على بطنك.. -اللي عصافيرها بتصوصو من العينات اللي كلتيها-.. وتقولي له مش ممكن.. أنا عمري ما اتفجعت كدة.. أنا أودامي أسبوع.. هابطل أكل فيه.....وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها.. آل يعني بتمسحي بؤك.. ثم تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك.. لفة الفول والطعمية اللي جايباها معاكي ... الدم دايمأ بيحت برضه وابقى ابعتيلنا .... بعد الجواز عشان نحضرك شويه نصايح تانية !!!

No comments: