Thursday, May 3, 2007

اخر بدع النصب فى المدارس يا بنى أدميين

اعادة القيد سبوبه جديده للمدارس لاجبار الطلاب على تقديم تبرعات للمدرسه .. والوزارة تؤكد الكلام ده كله مش رسمى و غير
صحيح
الاسطوره

تعمل ايه لو لقيت نفسك قبل الامتحان بقدره قادر هاتمتحن من منازلهم ؟ ! لانك ببساطه خلصت كل رصيدك بتاع الغياب اللى هو 30 يوم او 15 يوم متصله .. بالرغم من ان حصيله غيابك كلها لا تتعدى عدد اصابع اليد الواحدة !

لعل الامر يبدو للوهله الاولى غريباً ولكن الحقيقة ان معظم المدارس وخاصه الاعداديه منها والثانويه " ابتكرت " طريقة جديده لاجبار الطلاب على تقديم تبرعات للمدارس عن طريق خصم أيام من رصيد الغياب على طريقه " الوزير منع الضرب بس احنا هانفصلك ثلاثه ايام .. والثلاثة يجرورا ثلاثة ليفاجئ الطالب المسكين انه بين شقى الرحى اما انه يتحول منازل او "يسلك اموره مع المدرسه " يعنى يصلح الحوش او يشترى سبورات او يصلح شبابيك مكسورة .... الخ واكيد ليست كل مدارس مصر بهذه الدرجة من السوء ولكننا نتحدث عن امر شائع .. ولندع الطلاب يروا مأسآتهم بانفسهم ...


محمد طالب "ثانويه عامة " باداره عابدين التعليميه يؤكد انه فوجئ قبيل ارسال الاستمارات للوزاره بـأنه رصيده من الغياب " قارب على النفاذ " رغم انه لم يغب سوى خمسه ايام فحسب .. بيد انه فؤجئ ان المسئول عن الغياب فى المدرسه خصم له يوم غياب فى كل مره يتأخر فيها عن طابور الصباح حتى وصل عدد ايام الغياب إلى 29 يوماً و هنا اضطر لتقديم بعض القرابين للمدرسه على هيئه تصيلحات للمعامل ليتم شطب الغياب له وهو ما حدث بدلا من ان يمتحن من منازلهم .

اما رضوى " اعداديه " بادارة جنوب القاهرة التعليميه فذكرت ان المدرسة نصبت عليها باحتساب ايام غياب لها عن كل يوم خرجت فيه خلال الحصص " بالرغم من انها استأذنت " للذهاب لدوره المياه او للشرب باعتبار ان مديره المدرسة بتلك الطريقه تحافظ على النظام فى المدرسه .. ومن ثم فقد قابلت الاساءه بالاساءه و" فبركه " شهادة مرضيه عن الايام التى خصمت من رصيدها على الرغم من حضورها بس المهم ان الشهاده كانت مختومه .. المهم الختم !

و تروى شاهندة " ثانويه عامة " انها اضطرت لدفع 200 جنيه عشان تشحن رصيد الغياب بتاعها قبل ارسال الاستمارات للوزاره رغم انها بالفعل غابت ما يزيد عن 30 يوم بالفعل .. بس المدرسه بتاعتها عاملتها بمبدأ المسامح كريم !

طيب والوزاره ايه رأيها فى المهزله ديه ؟ .. كان ذلك نص السؤال الذى باغتنا به فريد امين عبد السلام المستشار الاعلامى لوزير التعليم ، مما جعله يؤكد بدايه ان الوزاره ليست على علم بكل " القصص" السابقه – على حد وصفه – و الموضوع كله فبركه من المدارس واولياء الامور لايعلمون و لا يكلفون انفسهم عناء السؤال للوزارة التى لن تدخر وسعا فى تعرفيهم ان كل الكلام ده لا اساس له من الصحة – يعنى افتكاسات من بعض المدارس – فالقانون يحدد هذا الامر بان من جاوز غيابه الحد الاقصى وهو 30 يوم يدفع رسوم " فى الوزاره " – يعنى مش فى المدارس " قدرها 10 جنيه فحسب ... و يحول بعدها منازل ولا يجوز له باى حال من الاحوال ان يستمر كطالب عادى يدرس فى المدرسه لانه هو الى هايكون جانى على نفسه وهايمتحن من منازلهم .. ودعى عبد السلام كل ولى امر حدث معه ابتزاز من اى نوع بالتوجه للوزاره لتقديم شكوى ضد المسئول مع انه اللى حصل حصل والاستمارات راحت الوزاره خلاص !

No comments: