Tuesday, May 8, 2007

موضوع هايعجب الرجاله جدا




ازاى تعكنن على زوجتك المصون !!!


الاسطوره ..


بما ان الجنس اللطيف دوما متخصص فى فن العكننة عليك أيها الزوج الغلبان فإليك عزيزى الزوج نصائحى الاكيدة لك التى تم تجريبها على آلاف الحالات وأثبتت نجاحاً منقطع النظير .

أولا - الصبح وانت رايح على شغلك وهى نايمة تعمد اسقاط اى شيئ او خبط الباب بصوت عالى علشان تصحيها هى كمان .. اشمعنى انت ؟ ولو حاولت ترجع تنام تانى قول لها مادام صحيتى حضري الفطار بقى
_

ولما ترجع من الشغل بدرى عشان تلحق ماتش الاهلى وهى عايزة تغير القناة .. كل ما حد من اللاعبين من اى فريق يمسك الكورة قولها معلش ثوانى بقى انا حاسس ان الكورة دى جون حتى لو كان حارس المرمى ماسك الكورة والماتش واقف لان فى واحد مصاب مع ملاحظة أن اغلب النساء ذو ثقافة كروية ضعيفة

_وفى يوم الجمعة بقى اصحى بهمة ونشاط وجهز الافطار لزوجتك بس متنساش انك تستخدم 15 طبق واكبر كمية من الملاعق والشوك و 5 حلل من اللى عندكم فى المطبخ و 10 كوبيات لاعداد طبق بيض وسندوتش جبنة

كما يراعى ترك اثار سمنة على الارض مع ترك التلاجة مفتوحة وقشر البيض فى الحوض .. وانتا عارف ليه طبعا

_أما فى عيد ميلادها فلازم تزينلها تورتة عيد ميلادها بخمسين شمعة ولو سألتك لية خمسين رغم ان عندها 25 سنة بس ؟ اتحجج بضعف الاضاءة فى البيت وانت بتبص على النجفة اللى عندكم اللى فيها 30 لمبة مع ابتسامة صفراء خفيفة .. وابقى ابعتلنا انتا محجوز فى اى مستشفى عشان نزورك.

_ولو عملت زوجتك المصون ريجيم اجرى على السوبر ماركت ومحلات الحلويات واملأ التلاجة شكولاتة وحلويات وجاتوهات مع ضرورة التجول وانت مستمتع بأكل الجاتوة امامها
_ أوعى تنسى رأيك فى طبيخها لو عاملة لحمة قول لها حلو اوووى الفراخ دى ..ولو طبخة بامية تقول جميلة اوى الملوخية دى حطة عليها اية يا حبيبتى ؟؟ ولو عملة كيكة قالها انا بحب اشرب شاى مع البسكويت الحلو دة !!

_ويوم الغسيل لو طلبت منك تنشر الهدوم قالها حاضر مع ابتسامة حانية وبعد ما تخلص نشر الهدوم ادخل عليها وقولها انا نازل اجيب الهدوم اللى وقعت منى فى الشارع ولو سألتك هو اية اللى وقع ؟ اذكر لها كل هدومها اللى كانت مغسولة مع فردة شراب من بتوعك علشان متبقاش مقصودة منك !
_
لو الزوجة قررت لا سمح الله مسح الارضيات فى البيت حاول انك تروح وتيجى على المناطق المبلولة متحجج بأنك محتاج تتصل ضرورى بواحد صحبك ومرة عطشان ومرة تانية بتجيب الجرنال ومفيش مانع انك تقول انك حاسس ان التليفون هيرن كمان شوية ...

_ ولما تكون مشغولة فى نظافة البيت او مع الاولاد وطلبت منك تغسل كوبتين الشاى بتوع الصبح الموجودين فى الحوض ارجعلها كمان دقيقة من دخولك المطبخ وانت ماسك كوبية من الاتنين وهى مكسورة واسألها فى براءة ارمى دى فين ؟؟ عشان تحرم تسالك تانى ..

وأخيرا بقى عشان كده كفاية ... لما تبقى قاعد تتفرج على التلفزيون وهى طالع عينها فى تنظيف البيت وبعد ما تخلص وتيجى يدوبكك تقعد تستريح جنبك بصلها وقولها حبيبتى معلش ممكن كوبية مية علشان ضهرى بيوجعنى !!

و طبعا احنا جايين نهدى النفوس ... ويهمنا راحة الجنس اللطيف فى المقام الاول ...أكيد انتوا فاهمين كده
لو البنانيت متضايقين .. قولولى وانا اعملكوا موضوع عن ازاى تطلعوا عين ازواجكوا عشان محدش يقول علي متحيز .. تمام كده

No comments: