Monday, May 7, 2007

مرور مفيش زيه فى العالم





تنظيم المرور فى مصر عندنا حاجة ولا فى الخيال !!


الاسطوره

تتميز مصر دوناً عن سائر البلاد اللى خلقها ربنا بعدة مزايا لعل ابرزها المرور اللى مفتش فى حياتى كلها مرور فى جماله .. تنظيم ايه !! وسرعة وسلاسة ايه !! وتوفير وقت مفيش بعد كده .. بس عايز اقولك على شوية نصايح عشان نحافظ على مرور بلدنا زى ماهوه متبوزوش .. أيوه هو متصلح وانتا اللى هاتبوزه ... لو عربيتك كبيرة أو قديمة، أستخدم المبدأ القانوني: اللي خايف على عربيته يوسع! ده عشان تحافظ على حياتك ليس الا !!! وحاول تبعد عن سكة العربيات المخرشمة لانهم بيسوقوا بنظرية ضربوا الأعور على عينه!! ._ انتا عارف طبعاً ان اللى يدخل ببوز عربيته الاول للتقاطع هو صاحب أولوية المرور! احرص على أن تكون صاحب أول بوز، ولكن لا تطبق ذلك مع أي لوري أو أتوبيس، حرصاً على بوزك لا مؤاخذة. وارجو الا تستخدم الإشارات لأنها تكشف نواياك للأعداء!!(أقصد باقى السيارات بالشارع) ._وأهم حاجة بقى أنك لا تترك مسافة للأمان بينك و بين السياة التي أمامك فهذا له عدة مخاطر.. فقد تملئ عربية ثانية الفراغ في ثواني و برضوه ما يبقاش فيه مسافة بينك و بين الي قدامك، كل الي كسبته انك اتأخرت لورا شوية أو تدي فرصة للعيال يعملوا غرز قدامك والادهى أن كل المشاة حيغمضوا عينيهم ويعملوا عبط ويعدوا من الحته دي وياريت تيجى على قد كده داللى وراك حيقعد يزمر - لو كان مؤدب - أو تسمع شوية أسامي حيوانات لو كان سواق تاكس - مؤدب - ، أو يخبطك من ورا لو كان سواق ميكروباص - و دول مفيش حد منهم مؤدب -. _ أوعى تفتكر إن الإشارات معمولة علشان تنظم المرور ،ديه معمولة علشان شكل القاهرة يبقى متحضر بس! وعليه فلازم تعتمد على العساكر ( مع تحملك كامل المسؤلية لو واحد منهم شاورلك تعدي و بلدياته الناحية الثانية فتح السكة للى جاى عكسك ! ) أو يفضل أن تخش ببوزك عربيتك وليقضى الله أمراً كان مفعولا ً_ ولو كنت مش واقف في الصف الأول في الاشارة اعمل حسابك تزمر بشكل متواصل و هستيري أول ما الأشارة تفتح، لأن الناس الي قدام بيبقوا واقفين في الاشارة من زمان و جايز جداً يكونوا ناموا_وعشان خطرى خد بالك قوى من نوعين من السائقيين بيسوقوا و كأنهم مش ممكن يموتواوهما موتوسيكلات توصيل الطلبات ( Home Delivery ). و سواقين الميكروباص. وإوعى تحاول تثبت لحد منهم إن فكرته غلط. مش من مصلحتك تعمل كده ..فاهمني!!!

No comments: